‘జై తెలంగాణ’ హారన్

‘జై తెలంగాణ’ హారన్

బైక్ బ్రేకు తొక్కినప్పుడు ‘జై తెలంగాణ.. జై జై తెలంగాణ’ అని హారన్ వస్తే ఎలా ఉంటుంది. సూపర్ కదా. ఇదే ఐడియా వచ్చింది గంధం సురేందర్ బాబుకి. కానీ ఇది ఎలా సాధ్యం? అసలు సాధ్యమవుతుందా? తెలంగాణ ఆకాంక్షని నరనరాల్లో నింపుకున్న సురేందర్‌కి ముందు అనుమానమే వచ్చింది. అసలు ఈ హారన్లు ఎక్కడ తయారు చేస్తారు. హైదరాబాద్‌లో చేస్తారా? వెతికాడు.

హైదరాబాద్‌లో హారన్లు దొరుకుతాయి.. కానీ.. మనకు కావాల్సిన పాటని, మాటని పెట్టుకోలేం. కానీ తెలంగాణ కోసం తన వంతుగా ఏదైనా చేయాలన్న సురేందర్ తపన మాత్రం వీడలేదు. ఆ ప్రయత్నమే అతనికి ఒక మార్గం చూపించింది. ఇంటర్‌నెట్‌లో అలాంటి కంపెనీల గురించి వెతికాడు. వందల్లో వచ్చాయి. వాటన్నింటిని సార్టింగ్ చేసి పదింటిని ఎంచుకున్నాడు. వారితో మాట్లాడాక ఢిల్లీలో ఉన్న ఒక కంపెనీలో ఇది సాధ్యమవుతుందని అర్థమైంది. ఆ తర్వాత ‘జై తెలంగాణ.. జై జై తెలంగాణ’ అని గాయకుడు దేశపతి శ్రీనివాస్ వాయిస్‌ని రికార్డ్ చేయించాడు. సీడీలోకి కాపీ చేసుకుని ఢిల్లీకి వెళ్లాడు. కార్ల స్పేర్ పార్ట్స్ తయారు చేసే ఆ కంపెనీ ఒక హారన్‌ని తయారు చేసిచ్చింది. అది చాలామందికి నచ్చడంతో బల్క్‌లో 10 వేల హారన్లను ఆర్డర్ ఇచ్చాడు. కారు రివర్స్ తీస్నున్నప్పుడు వచ్చే హారన్‌కి బదులుగా దీన్ని పెట్టుకోవచ్చు. దీన్నే టూ వీలర్‌కు కూడా హారన్‌గా పెట్టుకోవచ్చు. వెనక బ్రేక్ వేసినప్పుడు హారన్ వచ్చేలా కూడా దీన్ని సెట్ చేసుకోవచ్చు. పాపులర్ బాలీవుడ్ పాటలతో హారన్లు మార్కెట్‌లో ఎప్పటి నుంచో దొరుకుతున్నాయి. కానీ తెలుగులో..


అదీ తెలంగాణ స్ఫూర్తిని కలిగించేదిగా ఉన్న హారన్ మాత్రం ఇదే మొదటిది. వృత్తిరీత్యా సాఫ్ట్‌వేర్ ఇంజినీర్ అయిన సురేందర్ తన ఉద్యోగాన్ని ఫణంగా పెట్టి దీన్ని తయారు చేయించాడు.ఆదిలాబాద్ జిల్లా మంచిర్యాలకు చెందిన సురేందర్ ప్రస్తుతం హైదరాబాద్‌లో ఉంటున్నాడు. హారన్ల అమ్మకం కోసం జిల్లాకొక వాలంటీర్‌ని కోరుతున్నాడు. ఆసక్తి ఉన్నవారు, ‘జై తెలంగాణ’ హారన్ గురించిన పూర్తి వివరాలకు సురేందర్ సెల్ నెంబర్ : 9849419941లో సంప్రదించొచ్చు.