తాకత్.... A poetry by T Vasu

మబ్బుల్ని మింగిన పువ్వులు
పూల వాన..
చినుకులై రాల్తున్న తంగేడు పూలు
తుపానై..
గడ్డిపూలు.. మోదుగుపూలు
భూమి.. భూమ్మంతా
మా అనంతగిరి కొండలంత అందగుంది..
.... ... ...
చరిత్ర
ఉదయ సమువూదమను పానగల్ చెర్వొడ్డున
చింతచెట్టు కింద...
ఎర్రదుబ్బల...
తెలంగాణ పటం దిద్దుతున్న
పోరడి చూపుడేలు..
మా మట్టి మహా సముద్రం ముంగల
విశ్వభూనభో ఇతిహాసం
కాపిష్కల నీరంత..
కొట్లాటల పొద్దుగుంకే సవ్వాలే లేద్..
కాళ్లకు ఎన్కడుగు ఎర్కలే....
జంపన్నవాగు..జోడ్‌ఘాట్..కడి గుండ్రాంపల్లి...ఎల్బీనగర్...మానుకోట.. ట్యాంకు బండ్...తాండూరు...
ఉస్మానియా.. కాకతీయ.. హన్మకొండ ..
నెక్కొండ.. ఖమ్మం..
పోరాట తొవ్వెంబడి
వేలుకు వేలుగా
నిలు మైలురాళ్లు...
రక్తపు ధారలతో అచ్చుకట్టిన మైలురాళ్ళు

యాదయ్య చౌరస్తా పెద్ద దర్వాజను
తుత్తునియులు చేస్తున్న నినాదాలు

రెడ్యాల తొవ్వమీద
రెక్కలు విప్పిన తీటకోయిలాకుల నిరసన
రాయినిగూడెం మట్టిపిడికిళ్ల ధక్కాకు
పిండిపిండైన రచ్చబండ..
ఇప్పుడంతా రాళ్ళు.. కోడిగుడ్లు..
తమాటాలు..
ముళ్లకంచెలు... తుమ్మ మొద్దులు...
గాలినిండా టైర్లు కాల్తున్న వాసన..
మా ఉద్యమాల మంటల్లో
సూర్యుడైనా మాడి మసి కావల్సిందే....
పుస్తకాలు...
నెత్తుటి అట్టాలేస్కుంటయ్..
పేజీలు తిప్పితే..
వేళ్లకు ఎచ్ఛగా తగిలే అక్షరాలు...
ప్రాంతంపై ప్రేమున్న కాడ
ప్రాణానికి విలువుండదు
అక్షరం ఆత్మహత్య చేస్కుంది
టక్కుటమార..మాయజాల..
ఇడియట్ బాక్సుల.. దృశ్య శవపేటికల
అజీర్తితో... వామ్టింగ్ చేస్కునే
నీళ్ల విరోచనాల..ఎసిడిటి పుల్లటి తేన్పుల ..
వికరాల ... రోగాలతో విలవిల్లాడే...
ప్రేతాత్మల నవ్వుల...
మెంటల్ మంటల్లో కల్గిన కపాల మోక్షాల...
పక్కా నకిలీల...
ఏడ్పులనబడే నవ్వుల నయాచోర్...
పిలాస్టిక్ ఉద్యమాల.. ఆలోచనల
పెంటదిబ్బల.. ఆత్మవంచనల.. .
అసంబద్ధ... సమైక్యభావవీచికల....
మడత పేచీల...
గూర్చి రాయలేక ...
అక్షరం ఆత్మహత్య చేస్కుంది...
ఛత్రినాక చౌరస్తా కాడ
కూలిందెప్పుడో పాత బంగ్లా..
గక్కడో మొండిగోడ
మొలుస్తున్నయ్.. అక్షరాలు
సూర్యుడు నిద్ర లేచే యాల్ల...
దస్ జిల్లొంకా నారా హై ..
తెలంగాణ హమారాహై....

మంచిరేవుల బాటపొంటి
బాహ్యవలయ రహదారి అను అవుటర్ రింగ్‌రోడ్డు ప్రక్కన
ఎండిన చెట్టు మీద
ఆకులై మెరుస్తున్నయ్ పాలపిట్టలు...

- తమ్మనబోయిన వాసు